Freda se vinnige suurlemoenkoek
Freda my kollega, het hierdie lekker reseppie in `n tydskrif opgespoor en met my gedeel. Ek het hom `n bietjie aangepas na my smaak. Vir die koek word alles saamgegooi, geroer en gebak. Ek plaas die oorsponklike resep net so maar sal ook my veranderings plaas. Ek verdubbel gewoonlik die koek dan pas hy in `n oondpan.
100g sagte botter 350ml bruismeel(koekmeel kan ook gebruik word) 5ml bakpoeier(indien gewone koekmeel gebruik voeg nog 1 tl ekstra by) 200ml strooisuiker(ek gebruik suiker as ek uit strooisuiker is) 2 ekstra groot eiers 90ml melk skil van een suurlemoen
Glasuursel Sap van een suurlemoen (45ml) 100ml strooisuiker gekristaliseerde suurlemoenrepies
Voorverhit die oond tot 180 grade. Smeer `n pan 18x28cm goed met margarien. Plaas al die bestandele in `n mengbak en klits goed met `n elektriese menger 2-3 min tot goed gemeng en glad. Giet in die pan en maak bokant gelyk. Bak 30-40 min of tot ferm as liggies daarop gedruk word. Klits intussen die suurlemoensap en strooisuiker saam en giet oor die koek net nadat dit uit die oond kom. Laat afkoel. Sny in blokkies en versier met versuikerde skilrepies.
My glasuursel
Ek neem 2 k versiersuiker en meng dit met `n klein bietjie warm water tot `n smeerbare pasta. `n Druppel suurlemoengeursel word bygevoeg. Sodra gemeng smeer oor koek wat effens afgekoel het en versier soos verkies. Ma Bootha is lief vir `n Suurlemoenkoek en ek maak dit altyd vir haar wanneer ek gaan kuier. Baie lekker! |
