Ronel se roompoffertjies
Hierdie reseppie kom van `n kollega af wat dit vir my gegee het. Dit het intussen weggeraak en ek moes haar in Pretoria opspoor waarheen sy verplaas is, sodat ek dit weer kon kry. Hierdie is Chris my seun se gunsteling en hy wil altyd weet wanneer ek daarvan maak. Ek maak hulle lekker groot, soos `n mens vir `n groot man sal maak!
Deeg 250ml kookwater 125ml margarien 250ml gesifte koekmeel 2ml sout 4 groot eiers
Vulsel 500ml room 25ml strooisuiker of na smaak 2 ryp piesangs, fyn gedruk 1ml vanieljegeursel
Bolaag 300ml versiersuiker 75ml kakao 15ml margarien 30ml kookwater
Gooi kookwater in `n kastrol, roer botter by en verhit tot gesmelt. Roer meel en sout alles tegelyk met `n houtlepel by sodra vloeistof vinnig opkook. Roer vinnig totdat mengsel `n stywe bal vorm en nie meer aan kante vasklou nie. Haal van stoof af en klop `n minuut lank en laat sowat 5 min afkoel. Voeg eiers een vir een by en klop goed na elke byvoeging. Skep teelepelsvol op `n gesmeerde bakplaat. Bak 10 min by 220 grade en dan 25 min by 180 grade. Maak `n snytjie in een kant van elke poffertjie sodat stoom kan ontsnap en laat afkoel. Klits room styf, voeg strooisuiker, piesangmoes en geursel by. Meng goed en skep in poffertjies. Sif versiersuiker en kakao saam. Roer botter by en maak met kookwater aan tot `n halwe dik glansversiersel. Smeer op poffertjies en laat styf word in koelkas. Lewer 3 tot 4 dosyn poffertjies. |
