Appeltoffietert
Hierdie reseppie is heerlik besonders veral met sy karamelsousie wat oor hom gegooi word. Baie maklik ook want alles word net bymekaar gevoeg en gemeng.
Tert 30ml botter 185ml suiker 250ml koekmeel 10ml bakpoeier knypie sout 250ml melk 1 blik (385g) tertappelskywe
Stel oond op 180 grade. Room die botter en suiker saam. Sif koekmeel, bakpoeier en sout saam en voeg beurtelings met melk by roommengsel. Giet deeg, dis `n slap deeg, in `n gesmeerde tertbak. Sny appelskywe fyn en plaas bo-op deeg. Bak vir sowat 45 minute.
Sous 250ml room 125ml suiker 7-10 karameltoffies (die sagte soort in die boksies )
Smelt alles saam oor lae hitte vir sowat 5 minute en roer gedurig. Giet dit oor die tert sodra dit uit die oond kom. Indien verkies, kan jy dit saam met styfgeklopte room voorsit. |
