Mosterdring
Hierdie resep is heerlik saam met koue vleis, braaivleis, skaapboud of hoender. Ek maak dit altyd in `n ring en vul die holte met aartappelslaai of tamatiewiggies en komkommerskyfies. As jy wil uithang, is dit net die ding om te maak.
4 eiers 250ml water 125ml asyn 175ml witsuiker 15ml gelatien 15ml mosterdpoeier 2ml borrie 1ml sout 250ml room
Klits die eiers in die boonste deel van `n dubbelkastrol. Klits die water en asyn by die eiers. Meng die suiker, gelatien, mosterd, borrie en sout en meng dit baie goed met die eiermengsel. Plaas dit oor kokende water en roer aanhoudend totdat die mengsel effens dik is. Laat dit afkoel tot lou, maar roer kort-kort sodat daar nie `n vel vorm nie. Klits die room tot styf en vou by die mosterdmengsel in. Giet dit in `n ringvorm wat met spray en cook gespuit is en laat stol in die yskas. Ontvorm die slaai op `n mooi slaaibord en vul en garneer soos jy verkies. |
